Hovudmålsetjingane for Noregs internasjonale miljøsamarbeid er:
- å hjelpe til å få kontroll med og redusere globale miljøproblem
- å ta vare på norske interesser og redusere miljøskadar i Noreg som skuldast aktivitetar og utslepp i andre land
- å sikre ei berekraftig utvikling og betring av miljøtilstanden i nærområda våre og i utviklingslanda
Noreg prioriterer miljøsamarbeid om:
- klima
- biologisk mangfald
- helse- og miljøfarlege kjemikaliar
- havspørsmål.
Forpliktande internasjonalt samarbeid
Noreg vil arbeide for at det internasjonale samarbeidet blir vidareutvikla med sikte på å få fram ambisiøse og forpliktande avtalar. Globale og regionale samarbeidsorganisasjonar må bli effektive reiskap for berekraftig utvikling. Rammevilkåra for internasjonal handel må støtte opp om dette. I tillegg er det viktig at miljøomsyn blir integrert i norsk utviklingspolitikk.
Kva internasjonalt samarbeid deltek Noreg i?
Noreg er engasjert i ei lang rekkje internasjonale fora og samarbeid:
- I Noreg sine nærområde står Arktisk Råd, Barentssamarbeidet og det bilaterale samarbeidet mot Russland sentralt.
- EU er vår viktigaste samarbeidspartnar i Europa. Særleg viktig er samarbeid med dei nye medlemslanda. Det europeiske miljøsamarbeidet skjer innanfor rammene av EØS-avtalen og den økonomiske kommisjonen til FN for Europa (ECE).
- Globalt jobbar Noreg gjennom FN, spesielt gjennom miljøprogrammet til FN og Kommisjonen for berekraftig utvikling, Organisasjonen for økonomisk samarbeid og utvikling (OECD), Verdens handelsorganisasjon (WTO) og bilateralt eller multilateralt utviklingssamarbeid.